我正考慮轉行做頭盔生意，應該大有可為。

香港人一向公德心欠奉，高空擲物意外時不時發生，可謂司空見慣。小至煙頭、報紙、橙皮，大至單車、石油氣罐，頭獎項目層出不窮，惟路人卻一步一驚心，分分鐘驚中頭獎。

近日再加送墜物，早前女人街才塌下石屎擊斃女小販，近日又案件重演。繼前日北角油罐墜下擊中女途人，昨午銅鑼灣、九龍灣及灣仔再先後發生三宗高空墜物案，分別塌下假天花鐵片及玻璃窗，差點又造成慘劇，幸好三名傷者福大命大，僅受皮外傷，算做執番條命。

不過，千萬別以為在空內或簷篷下走動便萬無一失。不錯，你或可避過高空墜物之禍，但你還是難敵扑頭黨。扑頭黨在港愈來愈猖獗，今年首七個月已發生八十五宗扑頭案，破案率卻不及一成。連保安局局長葉劉淑儀都擔心案件會成風氣，遂增派人手巡邏有關黑點，問你話唔驚？

所以話呢，一於轉行賣頭盔，既可避高空墜物又可防扑頭黨，一舉兩得，一定有市場。趁夏季的漁夫帽熱潮剛結束，一於食住個勢，推出獨門頭盔生意獨霸市場，必定賺個滿堂紅。